غنيت بالطرق القصير

غنيت بالطرق القصير
واحوف بيت الشعر حوف

النهر مايشبه غدير
يجرف عناقيد الصروف

وانا بديدنها مدير
وألطم زعانيف الانُوف

عشير للطيب عشير
واللاش شرواه محذوف

ياغلام زاورك النذير
يدحم بجنبه والكتوف

يعوم في بحرٍ غزير
ويسبح بفكره والكفوف

رد المهند بالجفير
ماعاد تنفعك السيوف

تثير والا تستجير
قمرك آفل للخسوف

لكن دور لك خبير
مدرك بغمقات الحروف

من سرعته يمكن يطير
لا يعجل بالنكوف

شوفه مع الغدراء مُنِير
وبالنور مايقدر يشوف

حقير بالمسراء شرير
زهوف بالحجه زهوف

يعرب ويجهل بالضمير
ينوف بالبرصه ينوف

عطه التذاكر بالمسير
وعطه الحلايا والوصوف

خله يفر مع النفير
ويمشي على رؤوس القنوف

نظير بالمجلس نظير
يحب تفتيش الرفوف

وخط الرساله بالحرير
والطرس حطه بالظروف

واكتب عليها دير دير
رهبان حناء دير ادوف

تاصل اليا بابا زفير
اللي يرحب بالهنوف

ويرقد على صدر الغرير
ويلعب على كل الصنوف

مسكين مايقدر يسير
لو حج مايقدر يطوف

مستشعرٍ يشبه جرير
ويرقص على دف الدفوف

ودريد مايشبه زهير
الفرق واضح ياجحوف

ضرير في عقلك ضرير
دايم عن الجزله عزوف

لكن برطل للوزير
يمكن يزوجك العيوف

والبوم تسمع له صفير
بالليل ينعق بالكهوف

والارمني شّراب شير
لو كان مايكرم ضيوف

يخر مع ميسا خرير
وحط المضّرب بالردوف

ذليل في ليلٍ مطير
عند ام عامر بالحجوف

الخيل ماتنجب حمير
والهجن ماتنجب خروف

والطير مايقدر يطير
لاصار بالريش مخطوف

والنار تخر زمهرير
ثلجٍ مغاتيره حزوف

قر القرار مع القرير
ماعاد تنفعك الحلوف

ياغلام لا تنثر نثير
ازنف ترا طبعك زنوف

المونسه تصفر صفير
والراس لاالذيل معكوف

تسير ولا تستخير
الخصم زيزوم الصفوف


عيد بجاد بن شده العتيبي